Dy ditë pasi u shpall non grata nga Departamenti Amerikan i Thesarit, SPAK nuk ka nisur ende hetimet për ish deputetin e PDIU, Aqif Rakipi. Kjo strukturë ka thënë për News 24 se nuk mund të japë detaje për çështjen.
“Prokuroria e Posaçme është duke kryer të gjitha funksionet e saj bazuar në kompetencat që ka dhe legjislacioni në fuqi. Nuk mund të japim më shumë detaje për veprimet konkrete që kryejnë prokurorët”, thuhet në përgjigjen e SPAK.
Më 11 prill, Aqif Rakipi ishte pjesë e listës së emrave që u shpallën non-grata në SHBA. Bashkë me të, non-grata u shpall edhe biznesmeni Ylli Ndroqi. DASH arsyetonte në vendim se Rakipi është një ish-deputet famëkeq që ka ndikim të dëmshëm dhe destabilizues në proceset politike në Shqipëri.
Aqif Rakipi e humbi mandatin e deputetit në vitin 2018 si pasojë e ligjit të dekriminalizimit. Por në zgjedhjet e fundit parlamentare të zhvilluara më 25 prill 2021, djali i tij, Ornaldo Rakipi u zgjodh me një numër surprizë votash deputet i PS, duke lënë jashtë figura të tjera të rëndësishme në selinë rozë.
Discussion about this post