Arbitri Anthony Taylor ishte kryefjala pas finales së Europa League të këtij sezoni. Në ndeshjen mes Romës dhe Sevillas të fituar nga spanjollët vetëm pas goditjes së penalltive pasi koha e rregullt dhe ajo shtesë kishte përfunduar në barazim 1-1, gjyqtari anglez përfundoi nën sulmin e trajnerit të verdhekuqve, Jose Mourinho dhe tifozëve italianë.
Kryeqytetasit pretenduan për një 11-metërsh si dhe të paktën një karton të kuq për lojtarët kundërshtarë, pretendime të cilat nuk u morën parasysh nga Taylor. Kaq mjaftoi dhe Mourinho e akuzoi anglezin se vendosi fatet e finales, madje e priti gjyqtarin në parking për ta konfrontuar nga afër ndërsa në aeroport tifozët e Romës e sulmuan duke e goditur me sende të ndryshme.
Megjithatë, është UEFA që i del në krah Taylor dhe këtë e bën nga finalja e Champions League, atë mes Manchester City dhe Inter e luajtur në Stamboll. Arbitri ishte një i ftuar special i presidentit të UEFA-s, Alexander Ceferin me mediat që e përkthejnë këtë gjest të numrit një të qeverisë europiane si një “votëbesim” për 44-vjeçarin pavarësisht pretendimeve të Romës për paaftësinë e tij./SSA
Discussion about this post