Pas 24 orësh në morgun e spitalit të Traumës në Tiranë, trupi i pajetë i Aldi Ramës është tërhequr ketë mëngjes nga nëna e tij.
21-vjeçari i cili vrau nënkomisarin Saimir Hoxha në Lezhë dhe më pas veten, do të varroset në Durrës, për ceremoninë mortore të së cilit do të kujdeset e ëma.
Prindërit e 21-vjeçarit ishin të divorcuar, teksa babai i tij mësohet se ndodhet në një burg në Greqi, i dënuar për vrasjen e një personi, të cilin e kishte prerë me sharrë. Nëna e tij ka qenë në Greqi dhe atje ka pasur një martesë me një shtetas grek dhe më pas ishte kthyer në Durrës ku ka krijuar një tjetër lidhje.
I riu jetonte me gjyshërit e tij, ndërsa me herët këta të fundit kanë deklaruar se nuk dinin gjë për ngjarjen e rëndë dhe se ishin njoftuar vetëm nga mediet.
Aldi Rama nuk është person i panjohur për drejtësinë, pasi ishte arrestuar më parë për shpërndarje droge, që në moshën 17 vjeçare dhe së fundi ishte në arrest shtëpie nën akuzën “Prodhim dhe mbajtje e lëndëve narkotike”. 21-vjeçari ndërroi jetë ditën e djeshme në spitalin e Traumës duke mos i mbijetuar dot plagëve të marra në kokë.
