Presidenti i Republikës Ilir Meta, me anë të një postimi në Facebook, ka përgëzuar gazetarët që fituan tre çmime për gazetarinë investigative nga Bashkimi Evropian.
Kreu i Shtetit shkruan se modeli i gazetarëve, Luljeta Progni, Geri Emiri, Anila Hoxha dhe Esmeralda Keta, duhet ndjekur nga çdo koleg i tyre, në shërbim të lirisë dhe pavarësisë së medias, konsolidimit të demokracisë, garantimit të llogaridhënies dhe përgjegjësisë publike në çdo nivel të administratës.
Gazetarja Luljeta Progni, fitoi çmimin për kronikën “Skllevërit e naftës” që vendos në qendër të saj historitë njerëzore të naftëtarëve shqiptarë që prej vitesh luftojnë për të drejtat e punës dhe statusin e tyre.
Kurse, gazetari Geri Emiri, fitoi çmimin e dytë për një seri shkrimesh që raportojnë mbi pasojat e tërmetit të 26 nëntorit 2019 që goditi Shqipërinë perëndimore, kryesisht Durrësin.
Ndërsa dy gazetaret Anila Hoxha dhe Esmeralda Keta, fituan çmimin e tretë për shkrimin: “Qeveria ‘manipuloi’ bilancin e ndihmave për shtresat në nevojë gjatë Covid 19”, një hulumtim që u krye mes kushteve të vështira të krijuara nga pandemia e koronavirusit dhe që trajtoi problemet e lidhura me mbështetjen ndaj familjeve të varfra dhe përgjigjen e administratës shtetërore lidhur me këtë.
Çmimet e Bashkimit Evropian për gazetarinë investigative jepen në vendet e Ballkanit Perëndimor dhe në Turqi për të fuqizuar dhe mbështetur gazetarinë e pavarur dhe gazetarët investigativë
