Partia Demokratike do të mbledhë ditën e sotme Kolegjin e Kryetarëve të PD-së. Lajmin e ka bërë të ditur sekretari i Partisë Demokratike Gazment Bardhi, i cili njofton se mbledhja do të fillojë në orën 16:00 dhe do të diskutohet mbi kalendarin dhe masat për organizimin e partisë pas Kuvendit të 18 dhjetorit.
Kjo mbledhje, sipas Bardhit është vonuar për shkak të protestës së dhunshme të 8 janarit dhe do të zhvillohet sot. Programi i diskutuar, propozuar dhe miratuar nga Kolegji i Kryetarëve, do t’i nënshtrohet më pas miratimit nga Kryesia e Partisë.
“Të nderuar Kryetarë, Nesër, datë 12 Janar, ora 16:00 do të zhvillohet mbledhja e Kolegjit të Kryetarëve të PD për diskutimin mbi kalendarin dhe masat për organizimin e partisë në zbatim të vendimit të Kuvendit Kombëtar të datës 18 Dhjetor “Për miratimin e programit organizativ të Partisë Demokratike”, që nuk u realizua dot për shkak të dhunës në datën. 8 Janar”, shkruan Bardhi.
Ditën e djeshme, Kryesia e Partisë Demokratike vendosi në mbledhjen maratonë përjashtimin e 8 anëtarëve të PD, përfshirë këtu edhe ish-kryeministrin Sali Berisha, ndërsa u pezulluan 19 të tjerë.
Këto vendime ekstreme u morën pas protestës së dhunshme të 8 janarit në godinën e Partisë Demokratike, ku mbështetësit e Berishës shkatërruan selinë e PD duke rrezikuar edhe jetën e personave që ishin në godinë.
Discussion about this post