Sabrina Benga, 23 vjeçarja që u vra nga bashkëshorti i saj me kallash, do të përcillet sot në banesën e fundit. Sabrina, nënë e një tre-vjeçareje u qëllua mbrëmjen e kaluar nga ish-bashkëshorti i saj Elton Metaj, i Cili i kishte shkuar në banesën e prindërve, dhe e ka qëlluar duke ngrënë bukë.
Ky krim ishte i paralajmëruar, pasi rreth një vit më parë, Meta kishte kërcënuar familjen e ish gruas dhe më pas kërcënoi se do kryente vetëvrasje. Më 20 shtator 2020 Eltoni për më shumë se 5 orë e mbajti bashkëshorten dhe familjen e saj peng në shtëpinë e babait të kësaj të fundit dhe u desh ndërhyrja e RENEA-s dhe FNSH për ta liruar.
Megjithatë ai u la i lirë pas disa muajsh burg dhe më pas kreu edhe krimin tronditës duke i marrë jetën ish-bashkëshortes së tij.
Sabrina Benga do të përcillet pasditen e sotme në orën 17:00 në banesën e fundit, teksa autori është arrestuar pas disa orësh nga policia mëngjesin e sotëm në një pyll në fshatin Peshtan.
31-vjeçari do të akuzohet për veprat penale “Vrasja për shkak të marrëdhënieve familjare” “Armëmbajtja pa leje” , “Kundërshtim i punonjësit të policisë” dhe “Dhunë në familje”.
