Trupi i Klodiana Vefa, shqiptarja e cila u ekzekutua me armë zjarri në Itali nga bashkëshorti i saj, Alfredi mbrëmjen e 28 shtatorit në Castelfiorentino të Firences, do të prehet në Shqipëri.
Varrimi do të kryhet ditën e shtunë, ndërsa në Itali janë mbajtur homazhe për ngjarjen që tronditi opinionin jo vetëm në Itali, por edhe në Shqipëri.
“Sapo mora një telefonatë nga Alessio, djali i Klodianës, duke më njoftuar për nisjen e tij dhe të motrës për në Shqipëri, ku do të bëhet varrimi i Klodianës të shtunën me vullnet të familjes”, tha kryebashkiaku i Castelfiorentino, Alessio Falorni – Vala.
Ai shtoi: “solidariteti që është zhvilluar ndaj kësaj familjeje është vërtet i madh”.
Kryebashkiaku tha se instuticioni që ai drejton ka hapur një llogari bankare për të mbështetur fëmijët e Klodianës.
“Për momentin ajo që kemi rënë dakord është që kjo llogari rrjedhëse e Bashkisë të vihet në dispozicion për të drejtuar çdo donacion, i cili do të vihet në dispozicion të tyre: IT94F0842537790000010299535. Arsyeja duhet të jetë: Klodiana”, u shpreh ai.
Klodiana Vefa u ekzekutua nga ish-bashkëshorti Alfred Vefa, i cili u gjet i vdekur 2 ditë më pas në provincën e Firences, San Casciano Val.
Policia u njoftua nga një banor i zonës i cili kishte vënë re një makinë “Golf” të dyshimtë të parkuar në anë të rrugës. Alfred Vefa kishte zbritur nga makina dhe kishte ecur rreth 50 metra me këmbë në mes të pyjeve, ku edhe u vetëvra me të njëjtën armë që ekzekutoi bashkëshorten e tij.
Discussion about this post