Me 72 vota pro dhe 37 kundër, Denar Biba është emëruar zyrtarisht si kryetar i Autoritetit të Konkurrencës. Kandidatura e tij ngjalli shumë diskutime, ku Partia Demokratike e cilësoi emërimin e tij si akt final të kapjes së institucioneve. Deputetja e Partisë Demokratike, Jorida Tabaku nga foltorja e Kuvendit, akuzoi Bibën se ka shantazhuar deri në Strasburg gjyqtarët lidhur me ligjin e pronave në Shqipëri. Miratimin për emërimin e tij si kryetar të Autoritetit të Konkurrencës, Tabaku e konsideroi si varje e mëlçive në qafën e ujkut.
“Në rolin e këtij institucioni, sot në Ditën e Luftës kundër Korrupsionit, Kuvendi do të miratojë zotin Denar Bibën. Unë nuk e njoh fare zotin Denar Biba dhe nuk e kam takuar asnjëherë. Por unë di pozicionin e tij që shkoi në Strasburg për t’i bërë shantazh gjykatësve për të mbrojtur ligjin antikushtetues të pronave në Shqipëri. Di raportet ndërkombëtare të BE, Gjykatës së Auditit, Departamentit të Shtetit që sot sektori më i korruptuar ai i Prokurimeve Publike. Atij i kanë kërkuar të bëjë diçka dhe ai e ka bërë. Sot qeveria po i var mëlçitë në qafë ujkut” – tha Tabaku.
Denar Biba, është vënë nën hetim nga Agjencia e Prokurorimeve Publike, lidhur me një tender me vlerë rreth 60 milionë lekë për blerjen e materialeve zgjedhore, gjatë kohës kur ishte zëvendëskryetar i KQZ-së, kontratë e cila është lidhur me kompaninë fituese me 12 prill. Gjatë këtyre hetimeve Denar Bibës iu zbardhën disa përgjime ku pretendohej se kishte vënë gjoba dhe ishte përfshirë në afera korruptive.
Biseda e pergjuar Denar Biba-Ledio Bianku
“Edhe pse regjistrimi ka shkëputje, në të dëgjohen qartësisht fjalët e Bibës”/
“Më mori Engjëll Agaçi, Sekretari i Përgjithshëm i Këshillit të Ministrave, e më thotë ç’e ke Ledi Biankun?
I thashë…
Më thonë që nga gjithë këta që kemi afër ne ti e ke [më afër].
[Agaçi më] tha… hajde të pijmë një kafe… ky muhabet të mërkurë, të enjte…
Tha, kemi këto problemet, e di ti gjithë kjo historia që do kërkohet shtyrja.
Të lutem tha, ti lutesh të na gjendet në gjithë këtë histori … sot është Niko Peleshi [këtu në Strasburg] ka takim [me Kryetarin e GJEDNJ-së]”
Biba vazhdon:
“Ma paguan ata biletën…”
Pastaj, Biba i drejtohet Biankut për ta bindur që të pranojë të ndikojë:
“A të ndalon më ky tren në stacion? Të ngelesh pa punë dhe ç’të vajti sakrifica! Njeriu bën kompromise në jetë.”
Por zëra kundër kësaj kandidaturë të Bibës kanë ardhur dhe nga rrahdët e PS-së, ku Erion Braçe u shpreh se ai nuk ka formimin dhe ekspertizën e duhur për të drejtuar këtë institucion.
“Kam nja 3 javë që në gojën e tij dëgjoj të lakuar në gjithë Tiranën. Për çfarë do them këtu dhe çfarë qëndrimesh. Do ishte normale t’i konsumonim sy në sy. Denar Biba nuk ka qenë funksionar në PS, mos t’i japim merita që nuk i ka. Nuk ka qenë as anëtar i PS, as deputet, asi kryetar organizate. Në dijeninë time, detyra e kryetarit të KQZ-së nuk është politike, por Kushtetuese dhe ligjore. Për mua, ky zotëria nuk është njeri politik i PS-së. Nuk ka asnjë lidhje, mos t’i japim merita që nuk i ka.”, u shpreh Braçe.
Discussion about this post