Autoritetet italiane arrestuan ditën e djeshme 15 persona të akuzuar për trafik droge nga Shqipëria, Kosova, Ekuadori, Kolumbia dhe Holanda.
Aktiviteti kriminal i tyre u zbulua nga zbërthimi i bisedave në aplikacionin e enkriptuar “Sky Ecc”, teksa operacioni u zhvillua me kërkesë të Drejtorisë së Qarkut Antimafia të Prokurorisë së Bolonjës
Sasia e trafikuar përfshin 23 kilogramë kokainë, 6 kilogramë heroinë, 80 kilogramë hashash dhe 240 kilogramë marijuanë, me një vlerë totale prej rreth 8 milionë euro.
Mediat përtej Adriatikut kanë zbardhur së fundmi edhe emrat e personave të cilët janë vënë në pranga, ku bëhet fjalë për shtetasit: Xhemali Desari, Avni Dushku, Fabjol Dushku, Rigers Kusi, Sokol Lumi, Bashkim Sula, Salvatore Gaetano, Antonio Modafferi, Daniel Palladino dhe Cesare Castellani.
Ndërkohë, mësohet se në masën e sigurisë “Arrest në shtëpi” janë lënë shtetasit Julian Nikolla, Armand Pepa dhe Tureldi Tafa.
Daniele Gatta rezulton të jetë dhëndri i Fabrizio Piscitelli, i njohur si “Diabolik”, ultras i Lazios dhe bosi i trafikut romak të drogës i vrarë në një pritë më 7 gusht 2019.
Sipas asaj që doli nga bisedat në “Sky Ecc”, bashkëshorti i vajzës së Piscitellit, i cili mburret për një lidhje të fortë me një nga liderët më të shquar në Romë, do të kishte dashur të investonte pesë milionë euro me një grup italianësh dhe shqiptarësh për të importuar drogë nga jashtë vendit.
Discussion about this post