Ka nisur nga puna Komisioni për verifikimin e firmave për mbledhjen e Kuvendit Kombëtar të PD, të thirrur nga ish-kryeministri Sali Berisha.
Gjatë fjalës së tij, kryetari i Komisionit Belind Këlliçi u shpreh se ky Kuvend është Kuvendi i demokracisë dhe se nga dita e sotme do të hapen të gjitha dyert për të rinjtë. Po ashtu, ai u shpreh se 72 përfaqësues të PD-së do të bëjnë verifikimin e delegatëve.
“E keni bërë këtë Kuvend më të jashtëzakonshëm. Jam i bindur që nga dita e sotme do të forcojmë institucionet. PD nga sot e tutje do t’i hapë të katra dyert për të rinjtë për t’i dhënë mundësi për të bërë karrierë. Do të verifikojmë numrin e kërkesave që janë drejtuar për të thirrur Kuvendin Kombëtar. Ky Komision do të ngarkojë 72 përfaqësues për të gjitha degët e PD për të verifikuar secilat firma. Kjo trupë në këtë moment në zbatim të statutit do të bëjë verifikimin e prezencës së delegatëve. Sekretariati teknik ngarkohet të kryejë të gjitha verifikimet përkatëse. Verifikimi do të bëhet nëpërmjet teknologjisë që mundëson në kohë reale pjesëmarrjen. Kryefjala e këtij Kuvendi do të jetë transparenca. Askush nuk i trembet të vërtetës. Në këtë Kuvend prevalon vetëm e vërteta”, tha Këlliçi.
Nisjen e punimeve të Kuvendit e bëri kreu i Këshillit Kombëtar të PD, Edi Paloka i cili nuk i ndali akuzat ndaj Bashës për bashkëpunimin me kryeministrin Edi Rama.
Discussion about this post