Oerd Bylykbashi është zgjedhur mbrëmë nënkryetar i PD-së. Në zgjedhjet e zhvilluar ditën e djeshme në selinë blu morën pjesë 210 anëtarë të Këshillit Kombëtar dhe lista përfundimtare me postet e ndara u publikua në orët e para të mëngjesit të sotëm.
Sakaq, pak minuta më parë Bylykbashi ka dhënë një reagim në lidhje me postin që ai ka tashmë në PD. Përmes një postimi në rrjetin social “facebook”, Bylykbashi shkruan se kjo ishte një detyrim i madh për të në rrugën për t’u rikthyer shpresën shqiptarëve tek PD.
“Falënderoj nga zemra anëtarët e Këshillit Kombëtar të Partisë Demokratike që më besuan detyrën e nënkryetarit të PD. Ky votëbesim për mua është një obligim i madh në rrugën e vështirë por fisnike për t’u rikthyer shpresën shqiptarëve, për fitoren e PD dhe rikthimin e vlerave ku ajo ka themelet. Një urim i veçantë për çdo mik e koleg që u zgjodh sot në detyrat e rëndësishme të PD. Respekt për të gjithë kandidatët që e bënë këtë garë dinjitoze e të fortë! Bashkë do t’ia dalim! Fitore PD”, shkruan ai. Kujtojmë që, së bashku me Oerd Bylykbashin, edhe Luçiano Boçi u zgjodh nënkryetar i PD-së.
Discussion about this post