Dy vëllezër janë arrestuar ditën e sotme nga policia në Dimal pasi u konfliktuan për motive të dobëta, me një 22-vjeçar, dhe më pas dogjën një orendi në ballkonin e banesës së tij.
Blutë sqarojnë se njëri prej vëllezërve i identifikuar me inicialet H. D., 44 vjeç, kishte thyer masën e sigurisë “Arrest në shtëpi”, të caktuar nga Gjykata, për veprën penale “Drejtimi i automjetit në mënyrë të parregullt”.
Vëllai tjetër i identifikuar me inicialet A. D., 50 vjeç, është arrestuar për veprën penale “Shkatërrimi i pronës me zjarr”.
Policia shton se është vënë nën hetim edhe 22-vjeçari i përfshirë në konflikt.
“Specialistët e Seksionit për Hetimin e Krimeve të Stacionit të Policisë Dimal kanë arrestuar shtetasit: H. D., 44 vjeç, për veprat penale “Largimi i të burgosurit nga vendi i vuajtjes së dënimit” dhe “Shkatërrimi i pronës me zjarr”; A. D., 50 vjeç, banues në Dimal, për veprën penale “Shkatërrimi i pronës me zjarr”. Arrestimi i këtyre shtetasve u bë pasi dyshohet se gjatë kohës që kanë qenë duke peshkuar, janë konfliktuar fizikisht për motive të dobëta, me shtetasin D. B., 22 vjeç. Pas konfliktit, shtetasit H. D. dhe A. D. (vëllezër) kanë shkuar në banesën e shtetasit D. B. dhe kanë djegur një divan në ballkonin e banesës së tij. Në vijim të veprimeve procedurale për këtë rast u referuan materialet në Prokurori, ku nisi procedimi në gjendje të lirë për shtetasin D. B., 22 vjeç, banues në Dimal, për veprën penale “Plagosja e lehtë me dashje”, njofton policia.
Discussion about this post