Kryeministri Edi Rama i është përgjigjur akuzave të Partisë Demokratike se ai ka shpenzuar 120 mijë euro nga paratë e buxhetit të shtetit vetëm për udhëtime qejfi.
Përmes një video në Facebook, Rama ironizon deputeten demokrate Orjola Pampuri, ndërsa shprehet se në të vërtetë udhëtimi për të cilin flet Pampuri ka kushtuar vetëm 345 euro.
“Bileta ekonomike e Lufthanses ka kushtuar 345 euro. Mesatarja vjetore e shpenzimeve për udhëtimet e mia zyrtare, të cilat paguhen nga fondi i kryeministrisë, është më e ulët se sa mesatarja vjetore e shpenzimeve të paraardhësve të mi, për arsyen e thjeshtë se ata udhëtonin në Business Class ndërsa unë kam udhëtuar thuajse tërësisht në ekonomik, me përjashtim te ndonjë rasti të veçantë – e njëjta gjë edhe për ministrat. Ndërkohë qysh prej vitit 2020, kur kishim presidencën e OSBE, u bë një marrëveshje me kompaninë Air Albania dhe shpenzimi për vitin 2021 ishte nën mesataren e viteve të mëparshme”, shprehet Rama.
Ndër të tjera, kreu i qeverisë nuk kursen ironinë edhe me matematikën e kryedemokratit Lulzim Basha apo “bravat” që janë kthyer ndër fjalët më të përdorura në retorikën e përdorur nga Berisha.
“Sasia më e lartë vjetore e shpenzimeve për udhëtimet e mia zyrtare ka qenë 4.623.089 lek në vitin 2014. Ndërsa shifra 120 mijë euro karburant për fluturim privat, është produkt i të njëjtës aritmetikë fantastiko-shkencore, që nga 1958 ulëset e Pallatit të Kongreseve nxori 5004 delegatë. Po t’i shumëzosh këta delegatë me 30 dhe pastaj të zbresësh 30, dalin fiks 120 mijë euro karburant për 7×7 brava, baraz 42 fluturime”, shton Rama.
Kujtojmë se pak ditë më parë, deputetja demokrate, Orjola Pampuri e akuzoi Ramën për shpenzimet “marramendëse” për udhëtimet e tij private, akuzë e cila u përsërit dhe nga kreu i PD-së, Lulzim Basha nga foltorja e Parlamentit.
Discussion about this post