Deputetja e Partisë Demokratike, Orjola Pampuri ka vazhduar edhe sot të denoncojë ato që i quan shpenzime luksi të kryeministrit Rama. Pampuri i referohet udhëtimeve të kryeministrit me charter, ndërsa sot në një deklaratë për mediat ajo thotë se i ka bërë një kërkesë zyrtare Drejtorisë së Shërbimeve Qeveritare.
Në këtë kërkesë Partia Demokratike shtron disa pyetje, ku ndër të tjerë kërkon që të bëhet publike kontrata dhe numri i fluturimeve me charter.
Ajo gjithashtu thotë se që nga viti 2020 Drejtoria e Shërbimeve Qeveritare, ka lidhur një marrëveshje me kompaninë ‘Air Albania’ për të marrë me qira një Aeroplan ‘Vip’ me te cilin udhëton kryeministri Rama.
“Që prej asaj kohe, shpenzimet për udhëtimet jashtë vendit të kryeministrit, mbulohen nga Drejtoria e Shërbimeve Qeveritare dhe transparenca e udhëtimeve dhe kostove është zero. Bazuar në të dhënat e tregut, ku vlera e udhëtimeve me avion charter varion minimalisht nga 15 mijë euro ora, cila është arsyeja e përzgjedhjes nga institucioni juaj të shërbimit të udhëtimeve nëpërmjet fluturimeve me avion charter për Kryministrin?
Sa është afati i kohëzgjatjes së marrëveshjes së bashkëpunimit për ofrimin e shërbimit të fluturimeve me avion charter ndërmjet Drejtorisë së Shërbimeve Qeveritare dhe shoqërisë ‘Air Albania shpk’?
Si është llogaritur tarifa e shërbimit dhe çfarë zërash përfshin?
Sa është numri i udhëtimeve me avion charter dhe vlera totale e paguar nga Drejtoria e Shërbimeve Qeveritare, nga momenti i hyrjes së fuqi të Marrëveshjes deri sot?
Listoni në mënyrë shteruese të gjitha udhëtimet e kryera me avion charter nga ana e Kryeministrit apo çdo zyrtar tjetër bazuar në marrëveshjen e mësipërme, duke përcaktuar për çdo rast vlerën e çdo udhëtimi si dhe vlerën e zërave përkatës së tarifës së shërbimit për çdo udhëtim, e cila përfshin koston e karburantit, taksat aeroportuale dhe përpunimi në tokë (ground handling), apo çdo kosto tjetër” – tha Pampuri.
Discussion about this post