Policia ka proceduar penalisht një 55-vjeçare, banuese në Greqi, e cila tentoi të dilte në pikën kuftare të Kakavijës me 11.800 euro me vete.
Shtetasja me iniciale E. R., raportohet se nuk e kishte deklaruar shumën e eurove që kishte me vete.
Ajo u procedua për veprën penale “Mosdeklarimi në kufi i të hollave dhe i sendeve me vlerë”, ndërsa u sekuestrua në cilësinë e provës materiale, shuma e eurove.
“Në PKK Kakavijë, në dalje të Shqipërisë, u krye kontroll në çantën e shtetases E. R., ku u gjetën 11 800 euro, të cilat kjo shtetase nuk i kishte deklaruar konform ligjit. Në vijim të veprimeve procedurale për rastin, u referuan materialet në Prokurori, ku nisi procedimi penal, për veprën penale ‘Mosdeklarimi në kufi i të hollave dhe i sendeve me vlerë’, për shtetasen E. R., 55 vjeçe, banuese në Greqi. Gjithashtu, u sekuestrua në cilësinë e provës materiale, shuma e eurove. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme”, njoftoi policia.
Discussion about this post