UEFA vijon me dorë të hekurt ndaj Rusisë, teksa ditën e sotme Komiteti Ekzekutiv është mbledhur dhe ka marrë të tjera vendime që lidhen me futbollin e këtij vendi, që është futur në luftë me Ukrainën.
Komiteti ekzekutiv ka vendosur sot: Rusia përjashtohet nga Nations League 2022/23 dhe renditet automatikisht e katërt e grupit 2 në Ligën B, ku ishte shortuar me Shqipërinë, Islandën dhe Izraelin. Rusia kështu bie në Ligën C.
Rusia është përjashtuar nga UEFA EURO 2022 për femra dhe do të zëvendësohet nga Portugalia, që u mposht nga rusët në play-off. Gjithashtu Rusia për femra është përjashtuar nga kualifikueset e Kupës së Botës 2023. Grupi E do të vazhdojë garën me 5 skuadra (Danimarka, Bosnje-Hercegovina, Mali i Zi, Malta dhe Azerbajxhani) dhe rezultatet me Rusinë do të konsiderohen të pavlefshme.
E njëjta gjë edhe me kualifikueset e EURO 2021-23 për moshat U21. Grupi C (Spanja, Sllovakia, Malta, Lituania dhe Irlanda e Veriut) vazhdon me pesë ekipe dhe duelet me Rusinë quhen të pavlefshme.
Klubet ruse ndërkohë nuk do të marrin pjesë në Champions League, Europa League, Conference League, Champions League Ëomen dhe UEFA Youth League, për sezonin 2022-23.
Rusia është përjashtuar edhe nga UEFA Fustal EURO 2022 për femra. Ajo ishte kualifikuar në turneun final dhe do garonte në grupin 1 me Portugalinë, Spanjën dhe Ukrainën. Në vend të Rusisë kualifikohet Hungaria. Rusia nuk do të ketë asnjë ekip as në UEFA Futsal Champions League.
Për Kupën e Botës Futsal FIFA 2024, Rusia nuk do të jetë në kualifikueset dhe vendin e saj e merr Norvegjia. Një tjetër vendim i fortë për Rusinë është se nuk i pranohet oferta që të organizojë EURO 2028 ose EURO 2032.
Discussion about this post