Ujësjellësi tenderoi 140 mln, banorët e Postribës sërish në protestë: Uji vjen prapë i ndotur

Një ditë pasi drejtuesit e Ujësjellësit në Shkodër deklaruan publikisht se janë investuar 14 milionë lekë (të reja) për të siguruar ujë të pastër në Postribë, banorët dolën sërish në protestë. Sipas tyre, ky investim nuk zgjidh problematikën, pasi uji ndotet nga gurorja në zonë. Ata paraqitën dhe analizat e kryera nga Drejtoria e Shëndetit Publik, ku shkruhet se uji nuk është i pijshëm.

“Kanë ndryshuar vendburimin, duke përdor ujë të papijshëm. Ne jemi kundër këtij investimi. Kërkojmë të ndalohet aktiviteti në gurore”, thanë ata.

Po kështu, ankohen dhe për mungesën e energjisë elektrike, teksa shprehen se nuk është investuar prej vitesh.

“Vjen tension i ulët, janë djegur pajisjet dhe askush s’mba përgjegjësi”, thanë tej banorët.

Besmir Lesha, drejtor i Ujësjellës-Kanalizime në Shkodër ishte të dielën në zonën e Rrasekut ku deklaroi se çështja e furnizimit me ujë dhe ndotja e tij është zgjidhur falë një investimi prej 14 milionë lekësh që i shërben 7,000 banorëve të Postribës.

Sipas tij, burimi i Rresekut në Postribë ndër vite ka qenë problem për shkak të ndotjes së ujit, por linja e re prej 4 km shmang përzierjen e ujërave të shiut me ujin e burimit.

Megjithatë, banorët ankohen sërish se pavarësisht investimit, uji po vjen sëish i ndotur në çezamt e tyre.

Tenderi

Ujësjellësi është ndërtuar në vitet 2013-2015 me fondet e Fondit Shqiptar të Zhvillimit ndërsa disa muaj më parë, Shoqëria Rajonale Ujesjelles-Kanalizime Qarku Shkodër tenderoi rreth 140 mln lekë (të vjetra) në një procedurë prokurimi me objekt “Rikonstruksion i veprës se marrjes dhe linjës se dërgimit te fshatit Postribe” dhe afat 3-mujor.

Tenderi u shënua me “Flmur të Kuq” nga Open Data Albania, që evidentoi mundësinë e shtuar për korrupsion në këtë procedurë, për shkak të s’kualifikimit të të gjithë operatorëve përveç fituesit.

Në garë ishin tre operatorë, ndërsa pas s’kualifikimit të dy prej tyre, firma fituese u përzgjodh “Ndregjoni SHPK”, që sipas dokumenteve zyrtare arkëtoi 13.793.071 mln lekë pa TVSH nga kontrata me Ujësjellësin.

Shoqëria Rajonale Ujesjelles-Kanalizime Qarku Shkodër është në pronësi të Ministrisë së Infrastrukturës dhe Energjitikës – 51%, Bashkia Shkodër – 36.33% dhe me përqindje më të vogël në varësi të 3 bashkive të tjera.