Presidenti ukrainas Volodymyr Zelensky deklaroi se Ukraina po bëhet më e fortë në Kursk. Vlerësimi i tij, sipas mediave të huaja vjen pasi trupat ukrainase të dielën hodhën në erë një urë të dytë në territorin rus. Ndërkohë përgatitet dislokimi i 120 mijë trupave ukrainase në kufi me Rusinë.
Luftimet vazhdojnë në rajonin e Kurskut, ku Ukraina ka avancuar që nga fillimi i inkursionit të saj të befasishëm ndërkufitar javën e kaluar. Por ajo mbetet sakaq nën presion mbi lindjen e saj të pushtuar.
Sidoqoftë, ofensiva e Kurskut e ka lënë Rusinë të ketë vështirësi për të mbrojtur territorin e saj.
Kievi duket se ka qëllime të shumta me sulmin e tij, përfshirë edhe rritjen e moralit pas disa muajsh të trazuar.
Ndërkohë një ndihmës presidencial ukrainas tha se inkursioni kishte për qëllim sigurimin e një procesi negocimi të drejtë.
“Baza e pranisë së Kievit në Kursk po forcohet dhe tani ne po përforcojmë pozicionet tona”, citohet të ketë thënë Zelensky në fjalimin e tij të fundit.
Si pjesë e përpjekjeve për të gjymtuar aftësitë logjistike të Moskës, forcat ukrainase njoftuan të dielën se hodhën në erë një urë tjetër mbi lumin Seym në rajonin Kursk, me sulme të sakta ajrore.
“Aviacioni i Forcave Ajrore vazhdon të privojë armikun nga aftësitë logjistike me sulme ajrore precize, gjë që ndikon ndjeshëm në rrjedhën e operacioneve luftarake”, deklaroi komandanti i Forcave Ajrore të Ukrainës, Mykolaiv Oleshchuk në një postim në mediat sociale.
Dy ditë më parë, forcat ukrainase shkatërruan një tjetër urë mbi Seym. Ministria e Jashtme e Rusisë tha se Ukraina kishte përdorur raketa perëndimore për të kryer atë sulm, të cilat me gjasë ishin HIMARS të prodhuara nga SHBA.
gijotina.com/
Discussion about this post