Ministrja e Jashtme, Olta Xhaçka, ka mbledhur sot trupin diplomatik. Lajmin e ka bërë të ditur vetë Xhaçka, e cila ka thënë se po shqyrtohet prishja e disa marrëveshjeve me Rusinë. Më tutje ajo është shprehur se, Shqipëria është krah BE dhe SHBA-në në këtë konflikt, duke shtuar se po diskutojnë për sanksionet e vendosura, të cilat janë të karakterit individuale dhe ekonomike.
“Shqipëria po bën gjithçka që mundet, në maksimumin e aftësive dhe kapaciteteve të saj. Vetoja e Rusisë bllokoi miratimin e rezolutës në Këshillin e Sigurimit. Por ky nuk ishte fundi i rrugës dhe rezoluta po diskutohet me të gjithë botën në Asamblenë e Përgjithshme, ku jemi optimistë, se falë përpjekjeve të të gjitha vendeve tuaja dhe shumë të tjerave, kjo rezolutë do të kthehet në një ushtrim që demonstron përkushtimin e botës ndaj Kartës së OKB-së dhe ndaj parimeve bazë të sistemit të bazuar në rregulla që ne kemi rënë dakord të respektojmë.
Kam udhëzuar të gjitha ekipet shqiptare, në OKB, OSBE, Këshillin e Evropës, Këshillin e të Drejtave të Njeriut dhe çdo forum tjetër ndërkombëtar apo rajonal, që të miratojnë të njëjtën qasje proaktive në mbështetje të Ukrainës dhe në denoncimin ndaj Rusisë”, u shpreh kryediplomatja shqiptare.
Ministrja Xhaçka deklaroi se ngjarjet në Ukrainë dëshmojnë se izolimi i Ballkanit Perëndimor është kosto e lartë për BE. Prandaj, të gjithë duhet të jenë në gatishmëri për të përballuar edhe pasojat ekonomike.
Discussion about this post