Juventusi ka zhgënjyer të gjithë fansat e tij duke humbur pikët e para të këtij sezoni, teksa është ndalur në shtëpi në një barazim 1-1 nga skuadra e Bolognas.
Një barazim që në fakt mund të ishte humbje nëse gjyqtari nuk do të kishte falur bardhezinjtë pas një kontakti Iling-Ndoje në zonë. Dhe duket se Masimiliano Allegri e ka vuajtur shumë faktin që ekipi nuk ia doli të merrte pikët e plota.
Në prononcimet para mediave pas ndeshjes në fjalë doli ndihmësi i tij Landuçi, i cili theksoi se trajneri kishte kaluar një situatë shëndetësore. “Asgjë shqetësuese”, tha Landucci para kamerave.
Më pas, ishte zyra për shtyp e klubit juventin që shpjegoi për “La Gazzetta Dello Sport” se ishte preferuar që t’i evitohej stresi, pasi ai kishte qenë i lodhur dhe shumë i mërzitur pas ndeshjes në fjalë.
Medium i njohur italian shpjegon se pikërisht momentet e para pas ndeshjes kanë sjellë edhe mërzinë e teknikut livornez.
Ai ka ulëritur me të madhe ndaj lojtarëve të tij në dhomat e zhveshjes në mënyrë të paprecedent, aq sa raportohet se gjithçka është dëgjuar edhe në sallën e konferencave apo në korridoret e stadiumit.
Kritika të forta për futbollistët, të cilët sipas tij nuk kishin qenë në lartësinë e duhur, por edhe për gjyqtarët pasi pretendonte se kishte një penallti të padhënë për Juventusin.
Nuk është hera e parë që Allegri shpërthen me ulërima ndaj skuadrës, por zakonisht më pas është shfaqur para mediave për të thënë versionin e tij për ndeshjen. Ndaj kjo ishte hera e parë që ai shmangte kontaktin me mediat.
Discussion about this post