14 persona kanë humbur jetën nga Covid-19 në Kosovë gjatë 24 orëve të fundit ku vihet re një ulje e numrit të viktimave krahasuar me ditët e kaluara. Ministria e Shëndetësisë në Kosovë, sipas të dhënave nga Instituti Kombëtar i Shëndetësisë Publike, ka njoftuar se nga 5.505 testime, 259 qytetarë kanë rezultuar pozitiv me virusin Covid-19.
Gjithashtu, janë shëruar 870 qytetarë, ndërsa numri i përgjithshëm i të shëruarve është 137.452. Në total numri i rasteve aktive është 17.000. Gjatë ditëve të fundit, Kosova ka shënuar një ulje të infektimeve me Covid-19 dhe fataliteteve, ku ditën e djeshme humbën jetën 23 persona, ndërsa u infektuan 424 të tjerë.
Qeveria e Kosovës zhvilloi sot një mbledhje online dhe mori një vendim në lidhje me masat e reja anti-Covid. Në vendim thuhet se në institucionet publike dhe private, deri me datë 26 shtator 2021, paraqitja në punë do të jetë vetëm e stafit esencial, ndërsa pjesa tjetër do të punojnë nga shtëpia.
Ndërkohë që fillimi i mësimit është shtyrë për dy javë dhe pritet të fillojë më 27 Shtator, por ende nuk është vendosur nëse do të zhvillohet online apo në auditore.
Në vendim thuhet edhe se të gjithë ata persona që hyjnë në territorin e Kosovës duhet të posedojnë një nga dëshmitë e mëposhtme: Certifikatën e vaksinimit për vaksinimin e plotë ose marrjen e një dozë të vaksinës kundër Covid-19, Testi RT-PCR negativ për Covid-19, jo më i vjetër se 72 orë, dhe dëshmi se personi ka kaluar Covid-19.
