Zonat malore në juglindje të vendit janë përfshirë nga reshjet e dëborës. Reshjet më të shumta janë regjistruar në zonë e Mashkullores në aksin rrugor Shtyllë-Panarit. Trashësia e dëborës në këtë zonë ka shkuar deri në 5 cm.
Në kushte të tilla ju kërkohet drejtuesve të mjeteve që në këtë aks të lëvizin vetëm me zinxhirë. Gjithashtu, dëbora ka përfshirë zonat malore të Voskopojës, Lekasit, Dardhas, Velçan si dhe majën e Bigllës në Dardhë.
Temperaturat në zonat malore kanë shkuar deri në -2 gradë. Në të gjitha këto zona nuk raportohen probleme në rrugët rurale. Probleme të vogla mësohet të ketë pasur në disa fshatra të zonave malore sa i përket furnizimit me energji elektrike kryesisht në linjat e tensionit të ulët.
Në Kukës, këtë të enjte ka nisur dimri i vërtetë. Temperaturat prej mbrëmjes së djeshme u ulën ndjeshëm të shoqëruara me reshje të dobëta shiu edhe me erëra të forta në qytet dhe fshatrat për rreth. Në zonat e larta malore në mëngjes ka pasur mjegull, ndërsa kanë rënë edhe reshjet e para të dëborës.
Dëbora e nisur nga mesnata e djeshme ka zbardhur Shishtavecin. Reshjet kanë qenë të lehta dhe nuk kanë shkaktuar probleme. Dëbora ka zbardhur edhe malin e Gjalicës duke paralajmëruar zbritjen e saj edhe në zonat e ulëta poshtë malit. Në Kukës prej ditësh është prezent moti i vranët dhe me reshje shiu, tipike të vjeshtës.
Por,dimri në Kukës edhe sivjet shihet si i vështirë për shkak të pandemisë së COVID-19, por edhe gripit stinor. Autoritetet lokale thonë se kanë marrë masa për të pritur dimrin e sivjetshëm veçanërisht në zonat malore.
Në zonat malore të Kalasë së Dodës dhe Lurës, bora sapo ka nisur të shtresëzojë, ndërsa në lartësi mbi 1500 trashësia ka arritur në mbi 10 cm
