Mazhoranca nuk i ndal thirrjet ndaj drejtësisë që të marrë parasysh vendimin e DASH dhe të nisë hetimet ndaj ish-kryeministrit Sali Berisha. Pas kryeministrit Edi Rama, ka qenë ministri i Drejtësisë Ulsi Manja ai që ka sulmuar direkt ish-kryeministrin Sali Berisha. Përkrah ambasadores amerikane Yuri Kim, në një konferencë Manja ju referua Berishës si elefanti në mes të drejtësisë, ndërsa tha se ka ardhur koha të veprohet me të. Manja tha se është e patolerushme që një person non-grata të sulmojë dhe hedh akuza ndaj ambasadores amerikane. Gjatë fjalës së tij në konferencën “Drejtësi në kohë sfidash”, Manja tha se Berisha duhet të hetohet për vrasjet e 21 Janarit, ‘Gërdecin’, çështjen Çez/Dia dhe kompleksin ‘Partizani’.
“Në mënyrë të patolerushme del dhe sulmon ambasadoren amerikane elefanti në mes të drejtësie. Kur do vij dita që drejtësia t’ia shtrojë petët e lakrorit këtij njeriu. Ai zotëria i shpallur “non grata”, si kalorës i korrupsionit dhe kundër demokracisë nga aleati jetik i vendit dhe kombit tonë, nuk është problemi i Amerikës, por i Shqipërisë. Shqiptarët meritojnë të dinë si qëndron drejtësia e re në raport me këtë çështje të rëndë për shtetin shqiptar, të cilën Qeveria Amerikane e ka thënë shumë qartësisht se u takon institucioneve shqiptare ta hetojnë dhe ta gjykojnë!
Zotëria është i famshëm për karshillëkun e tij ndaj ligjit dhe organeve të drejtësisë, të cilave u ka përplasur deri edhe derën në fytyrë, duke penguar ekzekutimin e urdhërave të tyre pas vrasjes së katër qytetareve në bulevard. Nuk është thirrur megjithatë kurrë nga organet e drejtësisë, as për ato vrasje, as gjithë atë shpërthim kriminal municionesh që hodhi në erë qindra shtëpi e mori dhjetra jetë njerëzish, as për të tjera skandale korruptive marramendëse, ku mbiemri i tij ka qenë qershia mbi tortën e babëzisë”, është shprehur Manja. Kujtojmë se në mbledhjen e Asamblesë pak ditë më parë kryeministri Edi Rama i kërkoi SPAK që të merret me Sali Berishën dhe Ilir Metën, në vend që të merret me “peshqit e vegjël”.
Discussion about this post