Në një deklaratë për mediat nga Shtëpia e Bardhë presidenti i SHBA, Joe Biden tha se ai dhe ekipi i tij i sigurisë kombëtare kanë qenë “duke monitoruar nga afër” situatën në terren në Afganistan, edhe pse Biden nuk ka dhënë vërejtje para kamerës për këtë çështje për disa ditë.
Presidenti amerikan ngriti pyetjen se edhe sa breza të tjera amerikanësh duhet që të vijohet të çohen për të luftuar luftën civile të Afganistanit.
Po ashtu, kreu i Shtëpisë së Bardhë tha se nuk do që të përsërisë gabimet që SHBA kanë bërë në të shkuarën.
Joe Biden vazhdoi të mbrojë vendimin e tij për të tërhequr të gjitha trupat amerikane nga Afganistani, edhe pasi forcat talebane morën Kabulin dhe bota pa imazhe të afganëve të dëshpëruar që përpiqeshin të largoheshin nga vendi.
“Unë qëndroj plotësisht prapa vendimit tim,” thotë Biden. “Pas 20 vjetësh, kam mësuar në rrugën e vështirë se nuk ka qenë kurrë një kohë e mirë për të tërhequr forcat amerikane.”
Biden tha se ai dhe ekipi i tij i sigurisë kombëtare ishin të qartë për rreziqet e largimit nga Afganistani dhe ai argumentoi se ngjarjet e javës së kaluar demonstrojnë sesi përfshirja e vazhdueshme ushtarake e Amerikës nuk mund të ketë mbështetur përfundimisht qeverinë afgane.
Presidenti amerikan kritikoi udhëheqësit e qeverisë afgane për ikjen nga vendi dhe trupat afgane për refuzimin për të mbrojtur siç duhet vendin e tyre.
“E vërteta është, erdhi më shpejt nga sa kishim parashikuar,” tha Biden.
