Kancelarja gjermane në largim Angela Merkel hodhi poshtë akuzat se lideri rus Vladimir Putin është pjesërisht fajtor për rritjen rekord të çmimeve të gazit. Gjatë samitit të Sllovenisë ditën e djeshme, Merkel u shpreh se Rusia mund të japë gaz vetëm në bazë të detyrimeve kontraktuale.
“Në dijeninë time, nuk ka urdhra ku Rusia ka thënë se ne nuk do t’ju dorëzojmë gaz, veçanërisht jo në lidhje me tubacionin në Ukrainë. Rusia mund të japë gaz vetëm në bazë të detyrimeve kontraktuale,” tha Merkel
Ndërsa udhëheqësit në Francë, Spanjë dhe vende të tjera po bëjnë thirrje që BE të ndërmarrë hapa urgjentë për të adresuar çmimet e gazit, të cilat në një moment të Mërkurën u rritën me 40% Merkel u shpreh se jemi mësuar me çmim të gazit shumë të ulët.
“Unë thjesht dua t’ju kujtoj se jemi mësuar me çmimet shumë të ulëta të gazit. Disa prej gazit argjilor në SHBA nuk mund të nxirreshin më sepse çmimet ishin aq të ulëta saqë nuk do të ishte paguar. Tani kërkesa po bëhet përsëri më e madhe, dhe ne do të duhet të shikojmë nga afër,” tha Merkel.
Pikëpamja e dobët e Merkel për rritjen e çmimeve të gazit mund të shpjegohet me faktin se, ndryshe nga shumë udhëheqës të tjerë evropianë, ajo nuk do të kandidojë për rizgjedhje. Udhëheqësi gjerman nuk ka pse të shqetësohet më për votuesit e zemëruar, të cilët mund të ndëshkojnë liderët që konsiderohen si jo simpatikë ndaj njerëzve që përballen me fatura të larta të energjisë.
Muajin e kaluar, 40 anëtarë të Parlamentit Evropian i bënë thirrje Bashkimit Evropian të hetojë rolin e Gazprom PJSC të kontrolluar nga shteti në rritjen e çmimeve të gazit natyror, duke thënë se ata dyshojnë për manipulim të tregut. Ata ngritën mundësinë që veprimet e eksportuesit të gazit ishin një përpjekje e qëllimshme për të përdorur çmimet e energjisë për të ushtruar presion politik mbi Evropën.
