Unioni i Gjyqtarëve të Shqipërisë (UGJSH) ka dënuar ashpër deklaratat e kryeministrit Edi Rama, i cili sulmoi publikisht gjyqtarin Klarent Dervishi, duke e akuzuar atë se po pengon lirimin e hapësirave publike në kryeqytet. Në një reagim zyrtar, Unioni i Gjyqtarëve i cilësoi komentet e Ramës si “denigruese ndaj figurës së gjyqtarëve dhe një formë presioni mbi gjyqësorin”.
Sipas deklaratës së UGJSH-së, kritikat ndaj vendimeve gjyqësore janë të lejueshme vetëm brenda kornizave kushtetuese dhe ligjore. Ata theksuan se sulmet politike ndaj gjyqtarëve jo vetëm që cenojnë pavarësinë e drejtësisë, por edhe minojnë besimin e publikut tek gjykatat. Unioni akuzon kryeministrin se po e kthen ushtrimin e një detyre kushtetuese në një “gjyq publik”, ku njëra nga palët, për shkak të fuqisë dhe hapësirës mediatike, denigron gjyqtarët dhe ushtron presion.
Unioni i Gjyqtarëve shprehu shqetësimin se deklarata të tilla përsëriten shpesh dhe nuk kanë për qëllim forcimin e shtetit ligjor. Ata i bëjnë thirrje Këshillit të Lartë Gjyqësor (KLGJ), si organi përgjegjës për garantimin e pavarësisë së gjyqtarëve, që të reagojë dhe të mbajë një qëndrim ndaj sulmeve që u bëhen gjyqtarëve për shkak të detyrës së tyre, “pavarësisht se nga vijnë ato”. Kjo deklaratë nënvizon nevojën për mbrojtjen e gjyqtarëve nga ndërhyrjet politike, të cilat rrezikojnë të dëmtojnë themelet e shtetit të së drejtës në Shqipëri.
Discussion about this post