Universiteti i Durrësit po përballet me kaos këtë vit të ri arsimor, për shkak se rektori akoma nuk ka marrë një vendim zyrtarë se si do të veprohet me studentët e pavaksinuar. Bëhet me dije se, studentët dhe pedagogët janë të paqartë sesi do të vijojë procesi mësimor apo verifikimi i studentëve nëse kanë marrë apo jo vaksinën.
Njëri nga pedagogët tha për mediat se, ata si staf janë të paqartë sepse nuk dinë si të veprojnë, pasi në auditorë këto dy ditë ka pasur edhe studentët të pavaksinuar.
“Kjo është një javë eksperimentale. Udhëzimi është i qartë. Studentë që nuk janë vaksinuar nuk duhet të vazhdojnë studimin pa vaksinën apo test PCR. Edhe ne jemi të paqartë, pasi në auditore hasim studentë që e kanë bërë ose jo vaksinën dhe këta të fundit nuk duhet të jenë në auditor, por ne s’jemi policë që t’i nxjerrim jashtë. Kam besim që shumë shpejt do të gjendet një zgjidhje”, thotë pedagogu.
Paraprakisht është deklaruar se nuk do të ketë leksione online, por platformat do të përdoren vetëm për dërgim materialesh mes pedagogëve dhe studentëve. Nga ana tjetër pedagogët shprehin kërkesën që leksionet të bëhen online, sepse e kanë të pamundur të kontrollojnë studentët një për një. “Do shpresoja të kishte leksione online. Duhet të ishte një gjë që duhej të ishte bërë më parë për të gjitha grupet e rriskuara nga mungesa fizike”, thotë njëri prej pedagogëve.
Ndërsa, disa nga studentët thonë që, më mirë të mbeten pa shkollë këtë vit se sa të marrin vaksinën me detyrim. “Do e rrezikoja (vitin akademik). Pse duhet të bëhet vaksina me detyrim vetëm në shkolla? Për ç’arsye? Nuk e kam me dëshirë dhe nuk dua ta bëj. Askush nuk mban përgjegjësi për çfarë do të ndodhë në trupin tonë. Përderisa janë vaksinuar të gjithë, pse jo”, shprehen studentët.
Mbajtja e maskës, sot ka qenë i vetmi kriter për të hyrë në auditore. Në ambientet universitare të gjithë presin të gjendet një zgjidhje sado e vështirë në mënyrë që viti akademik të nisë normalisht. Me kaos ka nisur ky vit i ri akademik edhe për Universitetin e Tiranës, ku në derën e çdo fakultetit ishin vendosur roje privatë që nuk lejonin hyrjen e studentëve të pavaksinuar. Pikërisht ky veprim ka sjellë përplasje mes rojeve të sigurisë dhe studentëve.
