Ura e Mifolit në ‘mëshirë të fatit’, banorët apel shtetit

Edhe pse mendojnë se është një urë e rrezikshme, kalimtarët apo drejtuesit e automjeteve qarkullojnë pa u shqetësuar në Urën e Mifolit në përditshmëri, e ndërkohë kjo “Urë e Vjetër” është vendi i preferuar i peshkatarëve.

Banorët janë shprehur njëzëri për FaxNews, që kjo urë ka nevojë për mirëmbajtje dhe apelojnë që shteti të vërë dorë.

“Shteti është mirë që ta mirëmbajë, ta riparojë që të mbetet. Mbeti pas dore gjatë kohës, është gjynah se është një urë e vjetër dhe të rinjtë duhet ta dinë se ku kanë jetuar këta njerëz. Nuk ka dëmtime nga dora e njerëzve. Gjithë bota këto ura i ka zili”– kanë thënë banorët për FaxNews.

Disa prej banorëve pohojnë gjithashtu se mungesa e barrierave mbrojtëse përbën një rrezik për sigurinë, madje nuk kanë munguar dhe rastet kur persona me probleme mendore kanë tentuar t’i japin fund jetës duke zgjedhur të hidhen nga kjo urë në ujërat e lumit Vjosë. “Ura të tilla janë pasuri kombëtare”, kanë thënë banorët, “nuk mund të rindërtohen më në të tilla standarde strukturore, ndaj mirëmbajtja e tyre është domosdoshmeri.”

Banorët që qarkullojnë në këtë urë kujtojnë me nostalgji kohën e sistemit të mëparshëm kur shteti tregonte vëmendje maksimale në mirëmbajtjen e objekteve të  tilla, teksa shprehin keqardhjen që pas viteve 90 kjo urë u la tërësisht në harresë./FaxNews