Ura e Zogut, një ndër monumentet më të radha në Ballkan, vijon të degradojë si pasojë e neglizhencës nga instancat përgjegjëse.
Specialistët shprehen se janë bërë 8 muaj që ura është shkatërruar nga shirat dhe pas shumë premtimeve për restaurim, ende nuk është bërë asgjë.
Ata shprehen se ura mund të shkatërrohet plotësisht, pasi për 30 vjet nuk ka pasur asnjë interesim nga institucionet.
Ura e Zogut është një nga më të veçantat për strukturën e saj arkitekturore. Stili i harqeve i japin asaj vlerë muzeore. Ajo gjendet në të majtë të rrugës së Kombit, në të dyja ekstremet e lumit Mat, që nga viti 1927. E quajtur për shumë vite Ura e Zogut, vetë mbreti ishte ideatori i ndërtimit të kësaj ure shumë funksionale, sidomos për kohën. Ato vite ajo ishte një portë e domosdoshme për të hyrë në Shqipërinë e epërme që përfshin Shkodrën, Lezhën, Mirditën, Tropojën, Kukësin, Pukën etj. Ura është projektuar nga një inxhinier italian Martini dhe pothuajse e gjithë baza materiale u soll nga italianët.
