Ura e vjetër mbi lumin Mat (Ura e Zogut), po degradon dita ditës, por duket se askush nuk e ka në plan rehabilitimin e saj. Prej kohësh është kthyer në një shqetësim për banorët, të cilët kalojnë ato çdo ditë. Ata ndihen të rrezikuar për shkak se ura ka çarje në sipërfaqe, janë krijuar gropa dhe këmbët mbështetëse kanë dalë në sipërfaqe. Shkaktarët tashmë dihen, kamionët e tonazhit të rëndë që kalojnë disa herë në ditë, mbi peshën e lejuar, por dhe firmat të cilat kanë gërryer shtratin e lumit për të marrë inertet. Nga ana e shtetit nuk është marrë asnjë masë, jo vetëm për të vendosur përpara përgjegjësisë fajtorët, por as për të vënë dorë në riparimin e urës.
Shpeshherë banorët kanë ngritur akuza, madje për firmat të cilat sipas tyre bashkëpunojnë me shtetin. Banorët janë ankuar disa herë për këtë shqetësim, e duket se dhe kësaj radhe do të bjerë në vesh të shurdhët.
E quajtur për shumë vite Ura e Zogut, vetë mbreti ishte ideatori i ndërtimit të kësaj ure shumë funksionale, sidomos për kohën. Ato vite ajo ishte një portë e domosdoshme për të hyrë në Shqipërinë e epërme që përfshin Shkodrën, Lezhën, Mirditën, Tropojën, Kukësin, Pukën etj. Ura është projektuar nga një inxhinier italian Martini dhe pothuajse e gjithë baza materiale u soll nga italianët. Zbatimi i projektit u bë nga një inxhinier shqiptar, Gjovalin Gjadri, inxhinier që ka projektuar rrugën automobilistike Milot-Burrel, që kalon nga livadhi i Turkut nëpër Mirditë.
