Urgjenca e QSUT-së ende nuk është rikthyer në funksion të plotë. Ndryshe nga sa pat deklaruar drejtoria e QSUT, më 31 maj 2024, urgjenca ende nuk i është kthyer 100% funksionit normal.
Mësohet se sallat koronargrafisë nuk funksionojnë dhe nuk bëhet eficent shtrimi. Duke qenë se është ende kjo problematikë, rastet me probleme të zemrës, dërgohen ende në sanatorium. Bashkë me rastet, sipas grafikut në Sanatorium shkojnë dhe dy mjekë nga Urgjenca. Urgjencat e tjera paraqiten tek sëmundjet e brendshme në QSUT.
As observimi nuk është vënë në punë për shkak të disa defekteve me rrjetin elektrik.
Mësohet se observimi funksionon kur pacienti është në mbikqyrje ose kur nuk ka vend pavioni.
Ndërkohë është në funksion Imazheria, Eko, 3 skanerat, rezonanca, grafia janë vënë në shërbim të pacientëve jo vetëm në spital, por edhe ato që kanë lenë datë kontrolli.
30 mln lekë u alokuan për kthimin në funksion të urgjencës së QSUT, ndërkohë Prokuroria e Tiranës kërkoi një riekspertim të shkaqeve të zjarrit. Drejtoresha Albana Fiço u dorëhoq pas 1 muaji e gjysmë, nga rënia e zjarrit dhe u emërua Alma Cani.
Zjarri në urgjencën e QSUT-së që ra më 11 shkurt 2024 në katin -1 në Urgjencë, shkaktoi kolaps në repartin e urgjencave. Prej më shumë se 3 muajsh pacientët detyroheshin të shkonin për të marrë shërbim në spitale si Shefqet Ndroqi, apo edhe në rrethe në Spitalin Rajonal të Shkodrës dhe Spitalin Memorial të Fierit.
Discussion about this post