Shoqata “Blegtorët Prodhues të Qumështit” është mbledhur përpara ministrisë së Bujqësisë, ministrisë së Financave dhe Kryeministrisë për të protestuar për skemën kombëtare 2026. Me disa pankarta nëpër duar, ata bëjnë thirrje për politika më të qëndrueshme për sektorin e bujqësisë.
“Bojkotoni ushqimin serb”, “Kontribuo të ushqehemi shëndetshëm”, “Naftë pa taksa”, “ Ulja e çmimit të qumështit nga përpunuesit në kohë lufte është antikombëtare”, “Duam të punojmë dhe jetojmë me dinjitet”, “Bojkotoni fermat serbe”, “Duam ministri bujqësie jo propagandë”, “Naftë pa taksa”, “Duam subvencione, naftë si jahtet” janë disa nga pankartat që ata kanë parashtruar ndërsa protestojnë përpara institucioneve.
Njëri prej tyre dëgjohet teksa thotë se nuk kanë dalë në protestë për të bërë politikë por për të kërkuar të drejtat e tyre.
Blegtorët kërkojnë ndërhyrje urgjente nga institucionet për të përmirësuar kushtet e punës dhe për të garantuar mbështetje konkrete për prodhimin vendas.
“Skema nuk na mbështet, kostot janë të larta. Skema 2026 nuk ishte ajo që u diskutua me ne. Të na subvencionohet nafta si jahtet. Të rritet mbështetja për blegtorinë, të bllokohet importi që na konkurron”, tha një prej protestuesve.
Ata mes të tjerash kërkuan subvencione nga shteti. “Kërkojmë subvencione si gjithë rajoni. Kemi 7-8 herë më pak subvencione sesa rajoni. Me kë duhet të konkurrojmë ne? Kërkojmë naftë pa taksa për fermerët ose të bëjë një rregullim qeveria për taksën e qarkullimit”, pohoi një tjetër.
Mesohet se Ministri i Financave Petrit Malaj dhe ai i Bujqësisë, Andis Salla, do të presin në zyrë 10 fermerë për të diskutuar nga afër kërkesat dhe shqetësimin e tyre.
Në këtë takim që mbahet në ministrinë e Bujqësisë do të marrin pjesë fermerë nga Shkodra, Fieri, Lushnja, Korça dhe Gjirokastra.
Discussion about this post