Situatë korrupsioni në prokurimin e ushqimeve për çerdhet, kopshtet dhe konviktet në Lushnjë. Kryebashkiakja e Lushnjës, Eriselda Sefa po e çon fondin e caktuar në duar të pasigurta përmes një procedure në shkelje të ligjit.
Më datë 25 mars 2024, Sefa ka mbyllur prokurimin me objekt “Blerje buke, artikuj bulmetore, artikuj ushqimorë dhe fruta perime, mishi dhe nënprodukte të tij për nevojat e kopshteve, çerdheve dhe konviktit”. Për të blerë këto ushqime për fëmijët janë planifikuar 133 milionë lekë.
Sipas dokumenteve të tenderit, pas thirrjes është paraqitur vetëm oferta e firmës “ 4S shpk” në pronësi të Xhino Sinanit.
Ligji kërkon që në mungesë të konkurrencës tenderi duhet të anulohet dhe të rishikohet për gabime apo ekzagjerime në kriteret e vendosura. Po ashtu, konkurrenca do ta kursente disi fondin që do të shpenzohet.
Por, Sefës i ka shkuar përshtat kjo situatë, duke mbaruar punë shpejt me kontratën. Kështu ndodhi, më datë 25 mars 2024, kur firma e Xhino Sinanit u shpall fituese, pa garë fare, me propozimin 130 milionë lekë. Sigurisht për këto shkelje flagrante të ligjit, Open Data Albania i ka vendosur “Flamurin e kuq”, si një shenjë alarmi për korrupsionin.
Bashkëpunëtori i korruptuar
Nga ana tjetër, biznesmeni që përfitoi kontratën ka një kaluar të mbushur me abuzime. Si mund t’i besohet blerja e ushqimeve të fëmijëve një biznesmeni që më parë është dënuar për korrupsion?
Shpjegojmë këtu se firma ‘4S’ drejtohet nga Xhino Sinani, por themeluesi dhe drejtuesi real i saj është babai i tij Shemsi Sinani, i cili me firmën “Sinani Trading” shpk është akuzuar më parë për vjedhje me tenderat. Më parë kompania quhej “M. B. KURTI” SHPK, por pas shumë abuzimeve dhe numrit të lartë të tenderave ndryshoi emri në “Sinani Trading” shpk, për t’i shpëtuar drejtësisë. Gjithsesi në vitin 2018 aferat e kësaj kompanie u zbuluan dhe pronari i saj Shemsi Sinani doli para drejtësisë.
Kujtojmë se, bëhet fjalë për skandalin ku u përfshi ish-zëvendës drejtori i burgjeve, Iljaz Labi.
Drejtori bashkë me Shemsi Sinanin kishin abuzuar dhe zhvilluar në shkelje të ligjit tenderin për blerjen e ushqimeve në burgje.
Sinani, kreu i kompanisë “Sinani Trading” shpk kishte fituar tenderin pa garë dhe me probleme në dokumentacione, asaj kohe Gjykata e Lartë vendosi katër vite burg për të. Nga hetimi ka rezultuar se administratorët takoheshin me njëri-tjetrin dhe binin dakord për pjesëmarrjen në tender, duke shkëmbyer informacionin dhe duke përpiluar dokumentet e pjesëmarrjes në prokurime, në mënyrë të tillë që të fitonte njëri prej tyre, sipas bisedave që ata bënin. Administratorët e këtyre shoqërive me në krye Shemis Sinanin paraprakisht përcaktonin edhe se cili prej tyre do të dilte fitues në njërin prokurim apo në secilin lot prokurimi. Por, pavarësisht këtij skandali, kompania e Shemsi Sinanin vazhdon të gllabërojë tendera me një emër të ri.
Duke bashkëpunuar me biznesmenë të tillë Sefa po ndjek gjurmët e paraardhësit të saj Fatos Tushe, që u dënua me burg për korrupsion me tenderat.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post