Gijotina.com ra pre e një sulmi kibernetik të paprecedent ditën e djeshme. Dyshimi për arsyet e këtij sulmi janë publikimi i të vërtetave për qeverinë shqiptare, korrupsionin masiv që ndodh në vend, ‘llomkat e majme’ që marrin oligarkët dhe sigurisht për skandalin e korrpsionit që ka kapluar Bashkinë Tiranë të drejtuar nga Erion Veliaj me aferën e njohur si “5 D”.
Kjo nuk është hera e parë që Gijotina.com bie pre e sulmeve kibernetike për shkak të publikimeve të fakteve kundër abuzimeve masive që ndodhin në vend, madje kanë qenë të shumta dhe të herëpashershme.
Sulmi më i rëndë ka qenë në rastin e publikimit të audio-përgjimit të Veliajt kundër presidentit të FSHF-së, zotit Armando Duka, ku ka pasur një sulm masiv prej disa javësh ndaj Gijotina.com.
Sulmet kanë qenë të shumëllojshme, duke filluar nga “reportet” në rrjetet sociale, tek sulme “DDOS”, deri tek viruset e ndryshme, metoda që njihen gjerësisht si metoda të ushtrisë së “Rilindjes”.
Këto sulme nuk e zbehin aspak misionin e medias dhe kurrsesi nuk do na ndalojnë në publikimin e fakteve dhe provave për abuzimet e ndryshme që ndodhin në vend, madje vetëm na japin forcë që të vazhdojmë akoma me më shumë vendosmëri misionin, në një kohë që shumë media janë të kapura nga politika dhe oligarkët.
Media ka një rëndësi dhe mision shumë të veçantë dhe duhet të jetë e pavarur dhe e paanshme, si dhe të lihet e qetë në punën e saj, për sa kohë kjo punë është e mbështetur në vlerat e gazetarisë dhe ka për qëllim të publikojë vetëm të vërtetën të bazuar në prova dhe fakte.
Por, disa individë që nuk duan që e vërteta të dalë sheshit, sulmojnë mediat e pavarura dhe të pakapura me sulme kibernetike, ashtu siç ndodhi edhe dje me Gijotina.com.
Gijotina.com u bën thirrje instancave përkatëse që të marrin masat për mbrojtjen e medias së lirë.
Discussion about this post