Forcat e armatosura të Kinës nisën një stërvitje të përbashkët sot rreth Tajvanit në përgjigje të “ndalimit” të nënpresidentit Lai Ching-te në SHBA përpara një vizite në Paraguaj në fillim të kësaj jave.
Stërvitjet kishin për qëllim “marrjen e kontrollit të hapësirave ajrore dhe detare” nga Komanda e Teatrit Lindor të Ushtrisë Çlirimtare Popullore të Kinës (PLA), që përfshinin patrulla të përbashkëta të gatishmërisë luftarake detare dhe ajrore rreth vendit ishullor.
“Patrullimet dhe stërvitjet kanë për qëllim të trajnojnë koordinimin e anijeve dhe avionëve ushtarakë dhe aftësinë e tyre për të kapur kontrollin e hapësirave ajrore dhe detare”, ka thënë zëdhënësi i komandës së PLA-së Shi Yi, njoftoi transmetuesi kinez CGTN.
Shi ka thënë se “aftësia e forcave të armatosura kineze për të luftuar në kushte reale luftarake do të testohet” gjatë stërvitjes.
“Patrullimet dhe stërvitjet shërbejnë si një paralajmërim i ashpër ndaj marrëveshjeve të fshehta të separatistëve të “pavarësisë së Tajvanit” me elementë të huaj dhe provokimeve të tyre”, ka shtuar ai.
Pekini e kishte dënuar ashpër “ndalimin” e Lait dhe ishte zotuar të merrte “masa të forta për të mbrojtur me vendosmëri sovranitetin kombëtar dhe integritetin territorial”.
“Në zemër të interesave thelbësore të Kinës, çështja e Tajvanit është baza e themelit politik të marrëdhënieve Kinë-SHBA dhe vija e parë e kuqe që nuk duhet të kalohet në marrëdhëniet Kinë-SHBA”, tha të premten Ministria e Jashtme.
Ministria shtoi se vendimi i Washingtonit për të ashtuquajturën “ndalesë” dërgoi “sinjale seriozisht të gabuara për forcat separatiste për ‘pavarësinë e Tajvanit’”.
Lai u kthye në shtëpi herët të premten pas një udhëtimi njëjavor, me një “ndalesë” dyditore në SHBA përpara se të nisej për në Paraguaj, ku mori pjesë në inaugurimin presidencial.
Ai mori mbështetje, por u përball me protesta nga diaspora tajvaneze dhe kineze gjatë qëndrimit të tij 25-orësh në New York. Në fluturimin e tij të kthimit, Lai pati një ndalesë të shkurtër në San Francisko.
Ministria e Jashtme kineze tha se SHBA-ja “ndjek me kokëfortësi strategjinë e përdorimit të ishullit të Tajvanit për të kontrolluar Kinën dhe vazhdon të shkelë parimin e një Kine”.
Nëntë avionë të PLA-së dhe gjashtë anije të Marinës së PLA-së u detektuan sot rreth Tajvanit, tha Ministria e Mbrojtjes e Tajvanit.
Forcat e armatosura tajvaneze “monitoruan situatën dhe angazhuan avionë, anije të marinës dhe sisteme raketore me bazë tokësore për t’iu përgjigjur këtyre aktiviteteve”, tha ministria.
Discussion about this post