Policia e Vlorës ka arrestuar një person për kultivim narkotikësh, ndërsa ka proceduar penalisht tre të tjerë për ushtrimin e paligjshëm të lojërave të fatit.
Mësohet se, në pranga ka rënë M. M., banues në Borsh, Himarë, pasi gjatë kontrollit të ushtruar në afërsi të stanit të tij, në vendin e quajtur Mastrogunë, Borsh, u gjetën të kultivuara fidan të dyshuar cannabis sativa.
Ndërsa, gjatë punës për ndëshkimin e personave që tentojnë të ushtrojnë aktivitetin e paligjshëm të lojërave të fatit, u konstatua se në lagjen “Qeriba Derri”, Vlorë në lokalin e administruar nga S. B., u gjetën dhe u sekuestruan 2 pajisje elektronike ku dyshohej se ushtronte aktivitetin e lojërave të fatit, duke fshehur të ardhurat me qëllim mos deklarimin e tyre.
Kështu, u procedua penalisht në gjendje të lirë S. B., 35 vjeç dhe S. D., 22 vjeç, i punësuar në lokal, për veprat penale “Organizim i lotarive të palejuara” dhe “Fshehja e të ardhurave”.
Gjithashtu u procedua në gjendje të lirë për veprën penale E. M., 30 vjeç, banues në Vlorë, pasi gjatë kontrollit në ambientet e një lokali, në lagjen “Isa Boletini”, në tavolinën ku qëndronte ky person u gjet dhe u sekuestrua 1 pajisje elektronike ku dyshohej se ushtronte aktivitetin e lojërave të fatit.
Materialet procedurale i kaluan Prokurorisë, për veprime të mëtejshme.
