Granada gjeti fitoren e parë në këtë edicion në La Liga, teksa luajti sot ndeshjen e tretë. Skuadra e Myrto Uzunit priti në shtëpi Majorkën, ku po ashtu në sulm u aktivizua Vedat Muriqi. Një duel shqiptarësh në elitën spanjolle, me sulmuesin e Kombëtares shqiptare që gjeti edhe golin e parë, duke shënuar në minutën e 70-të me penallti. Vlen të theksohet fakti se një penallti humbi Muriqi në minutën e 18-të.
Uzuni ka dhënë një intervistë të shkurtër për “La Liga TV”, me një video të publikuar në “Twitter”, ku thekson edhe njëherë vështirësitë për të arritur nga një vend si Shqipëria këtu ku ndodhet tani, si edhe çfarë dëshiron në të ardhmen.
“Kur vjen nga një vend si Shqipëria, nuk është e lehtë të arrish në La Liga. Më është dashur që të punoj shumë për realizuar ëndrrat e mia. Por, për këtë luhet futbolli, për ty dhe ëndrrat e tua, sepse në shtëpinë time ka pasur vetëm një opsion që të fitonim para, vetëm nga këmbët e mia. Në këtë jetë dua vetëm t’i falënderoj prindërit e mi që besuan tek unë dhe për njeriun që unë jam sot”, shprehet fillimisht Uzuni.
KROOS DHE MODRIÇ – “Kam një vit e gjysmë këtu te Granada dhe ndihem shkëlqyer. Jam si në shtëpinë time, pasi njerëzit më duan shumë. Ndeshja e parë debutuese ishte në ‘Bernabeu’ dhe kur shikoja lojtarë si Toni Kroos dhe Modriç, po mendoja dhe i thosha vetes: ‘Mos po luaj në FIFA në ato momente’”, thotë më tej anësori i përfaqësueses shqiptare.
LA LIGA – Sapo arriti në Granada në janar të 2022-shit, Uzuni luajti vetëm pjesën e mbetur, teksa Granada ndodhej në vështirësi dhe u rrëzua nga kategoria, aty ku sezonin e kaluar ai shënoi 23 gola. Por, tashmë i rikthyer në elitë, 28-vjeçari shprehet se dëshiron që të qëndrojë gjatë në këtë nivel: “Çdo gol është special kur shënon. 23 rrjeta në Kategorinë e Dytë spanjolle patjetër që janë shumë. Të gjithë e dinë se si është ajo kategori dhe sa e vështirë është.
Në këto momente po stërvitemi shumë mirë, çdo gjë është gati dhe të gjithë duhet të bëjmë akoma edhe më shumë. Ëndrra ime është që të vazhdoj të luaj në La Liga, eksperiencë e madhe padyshim, dhe dua të luaj për shumë ndeshje”, përfundoi Myrto Uzuni./PanoramaSport
Discussion about this post