Myrto Uzuni vijon të shkëlqejë me Granadën në kampionatin spanjoll, duke regjistruar një tjetër sukses me ekipin, por dhe në aspektin personal. 29-vjecari ishte ndër lojtarët në kyç në përballjen e fundit të skuadrës së tij ndaj Santander, e fituar në shifrat 3-0.
Uzuni arriti të shënojë 2 gola, duke shkruar me gërma të arta emrin e tij, si futbollisti i huaj me më tepër gola të shënuar në historinë e klubit të Granadës.
Konkretisht ai numëron 46 gola të shënuar në La Liga dhe Ligën e dytë ku ekipi qëndron aktualisht. Ky është një rekord absolut për Uzunin, i cili ka lënë pas El Arabin, një tjetër lojtar që ka bërë mirë me këtë skuadër.
Në total, ylli beratas numëron 103 përballje me ekipin e Granadës që prej transferimit të tij në vitin 2022. Më herët ai është aktivizuar me Ferencvarosin, Lokomotivën e Zagrebit, Lacin e Apoloninë, ndërsa karrierën e nisi te Tomori. Që prej 2018-ës është pjesë e kombëtares kuqezi.
Discussion about this post