Një ngjarje e rëndë ka tronditur qytetin e Maliqit këtë të dielë, ku një zjarr i papritur përfshiu banesën e familjes Azizllari, duke shkaktuar vdekjen e 40-vjeçares Merjeme Azizllari dhe djalit të saj 14-vjeçar, Luka Azizllari. Vajza e tyre 6-vjeçare ndodhet në gjendje të rëndë në spital.
Fqinja e familjes, Benereta Pashollari, rrëfeu për mediat momentet tragjike që panë sytë e saj. Ajo tregoi se zjarri nisi nga sfungjeri i një dysheku, i cili mori flakë dhe përhapte tym të dendur në gjithë shtëpinë. Për shkak të mungesës së oksigjenit, nëna dhe djali nuk arritën të shpëtonin dhe humbën jetën si pasojë e asfiksisë.
Pashollari tregoi gjithashtu se familja përballej me kushte të vështira ekonomike. Kryefamiljari punonte për të siguruar jetesën minimale, ndërsa nëna kujdesej për fëmijët, të cilët kishin edhe vështirësi shëndetësore, pasi ishin pjesë e spektrit autik.
“Familje punëtore, me ekonomi të dobët. Babai punonte, nëna mbante dy fëmijët dhe i ushqente me sa mundte. Bashkia u ndihmonte me ndihma ekonomike dhe ushqime. Vajza ishte më e vogël dhe me vështirësi në lëvizje, djali ishte në këmbë. Vajza u hodh nga dritarja për t’u shpëtuar, por nëna dhe djali nuk arritën të dalin. Një zonjë i shpëtoi vajzës, por nëna dhe djali humbën jetën,” tregoi fqinja.
Ngjarja ka lënë komunitetin në tronditje dhe rihap alarmin për kushtet e jetesës së familjeve në nevojë dhe rreziqet nga përdorimi i pajisjeve ngrohëse në kushte të papërshtatshme. Autoritetet vijojnë hetimet për të sqaruar plotësisht shkaqet e zjarrit.
Discussion about this post