Trembëdhjetë kandidatë janë në garë për të plotësuar vakancën në Gjykatën Kushtetuese, të krijuar nga përfundimi i mandatit të ish-kryetares Holta Zaçaj.
Nga 13 kandidatë, 8 prej tyre janë ish-komisionerë të shkallës së parë të vetingut dhe ish- anëtarë të organeve të qeverisjes së sistemit të drejtësisë.
Gjykata e Lartë ka zbardhur emrat e kandidatëve që kanë shprehur interes për të qenë pjesë e Gjykatës Kushtetuese.
Bëhet me dije se pas përfundimit të afatit 30 ditor të pranimit të kërkesave, kandidatët që kanë paraqitur interes për plotësimin e vakancës janë:
- Alban Toro
- Alma Faskaj
- Asim Vokshi
- Denar Biba
- Florjan Ballhysa
- Genta Tafa
- Irena Nino
- Klodian Rado
- Lulzim Hamitaj
- Naureda Llagami
- Nurihan Meta
- Rezana Balla
- Sinan Tafaj
Në një njoftim të Gjykatës së Lartë sqarohet se lista e kandidatëve, si dhe dokumentacioni i paraqitur prej tyre i është dërguar Këshillit të Emërimeve në Drejtësi për vlerësimin e kushteve dhe kritereve të emërimit të gjyqtarit të Gjykatës Kushtetuese nga Gjykata e Lartë.
“Lista me emrat e kandidatëve publikohet në faqen zyrtare të Gjykatës së Lartë, me qëllim që institucionet publike që kanë lidhje me sistemin e drejtësisë, organizata të shoqërisë civile me veprimtari në mbrojtjen e të drejtave të njeriut ose të krijuara për mbrojtjen e interesave të përdoruesve të sistemit të drejtësisë, të mund të paraqesin opinionet e tyre në lidhje me kandidaturat pranë Këshillit të Emërimeve në Drejtësi”, thuhet më tej në njoftim.
Mandati i Holta Zaçajt u bë temë debati publik në dhjetor dhe shkaktoi polemika mes saj dhe kryetarit të Gjykatës së Lartë, Sokol Sadushi. Ky i fundit këmbënguli se mandati i Zaçajt përfundonte në pranverë të vitit 2025 dhe hapi procedurat për përzgjedhjen e pasardhësit të saj duke shpallur vendin vakant. Nga ana tjetër, kryetarja e Gjykatës Kushtetuese pretendoi se mandati i saj përfundonte në fund të vitit 2025 dhe e akuzoi Gjykatën e Lartë për cënimin e sigurisë juridike të mandateve të gjyqtarëve të Gjykatës Kushtetuese.
Megjithëse Gjykata Kushtetuese e gjeti me shkelje njoftimin e kryer nga Gjykata e Lartë, e la në fuqi shpalljen e vakancës. Shumica e anëtarëve të Gjykatës Kushtetuese vendosën mbarimin e mandatit të Zaçajt më 10 mars 2025.
Discussion about this post