Në një deklaratë për mediat ditën e sotme, Prokurori i Përgjithshëm Olsjan Çela tha se harta e re gjyqësore është urgjente, prandaj priten të merren masa drastike për të amortizuar vakancat në sistemin e drejtësisë.
Çela tha se tashmë institucionet duhet të jenë më të kujdesshme në rekrutimin e stafit, ndërsa bëri me dije se ka kërkuar në ILD inspektimin për 6 prokurorë, për të cilët kanë nisur hetimet.
“Ne patëm një takim dje. Ka qenë një shqetësim që e kam paraqitur dhe në takimet e tjera, urgjencën e ndërmarrjes së një harte të re gjyqësore. Mendojmë se në një plan afatmesëm do arrijë të amortizojë vakancat e shumta në sistem. Kjo do të thotë se ne duhet të marrim masa drastike. Kjo masë nuk do të jetë e vetme.
Do të merren masa edhe sa i përket funksionimit të shkollës së magjistraturës. Rigrupimi i prokurorive mendojmë se do të krijojë një shpërndarje më të drejtë të punës mes prokurorëve, si dhe një ngarkesë të përballueshme. Por prurjet e reja janë çelësi i zgjidhjes. Ne kemi kërkuar nga ILD deri tani inspektimin e 6 prokurorëve. Di që ka nisur procedimi për disa nga rastet”, u shpreh kryeprokurori.
Kujtojmë se, harta ka sjellë edhe përplasje mes Këshillit të Lartë të Prokurorisë, ku KLP thotë se KLGJ nuk i ka përfshirë në grupin e punës. Shkrija e gjykatave sjell automatikisht shkrirjen e prokurorive dhe lënien në funksion vetëm të një gjykate Apeli.
