Kryeministri Rama, sa herë i jepet mundësia ngre flamurin e propagandës, duke deklaruar se ne jemi të parët, e bëmë të parët këtë apo atë në rajon, por harro një detaj të rëndësishëm, që ne ecim me hapin e breshkës.
Kështu ka ndodhur edhe sot, kur ai ka dashur të rikthejë në vëmendje vaksinimin e shqiptarëve. Teksa ndodhet në një vizitë në SHBA, ai ka postuar një foto me drejtorin ekzekutiv të Pfizer, duke deklaruar ndër të tjera, se Shqipëria ishte e para në rajon që nisi vaksinimin e popullsisë.
“Në zyrat qendrore të kompanisë Pfizer në Nju Jork, me drejtorin ekzekutiv Dr.Albert Bourla, i cili na hapi dyert një vit më parë duke na mundësuar nisjen e vaksinimit përpara të tjerëve në rajon dhe duke na e lehtësuar ndjeshëm luftën me Armikun e Padukshëm:, u shpreh Rama në postimin e shoqëruar me një foto me dr. Bourla.
Por për ironi të fatit, vetëm pak orë më parë, Gijotina.com kishte publikuar një raport të Open Data, ku rezulton se Shqipëria ndodhet në vendin e katërt në rajon për numrin e popullsisë së vaksinuar me të dyja vaksinat. Pra, e kemi nisur të parët, por duket se sportisti Rama është lodhur gjatë ndeshjes me këtë virus dhe për këtë arsye na kanë parakaluar Serbia, Maqedonia e Veriut e Greqia. Por, për Ramën ndoshta rëndësi ka vetëm show propagandistik që të tregojë se ne po vaksinojmë popullsinë, por jo sa prej qytetarëve të tij kanë marrë dy vaksina dhe kanë krijuar imunizim ndaj virusit vdekjeprurës.
