Ish-ministri i Drejtësisë, Ylli Manjani ka reaguar lidhur me masat e reja Anti-Covid, që prekin të gjithë punonjësit e administratës publike, punonjësit e supermarketeve dhe qendrave tregtare në Shqipëri që nuk janë vaksinuar. Ata do të duhen te vaksinohen, pasi më datën 4 janar do të kërkohet karta e vaksinimit ose prova e testit PCR negative çdo pesë ditë.
Sipas Manjanit këto rregulla janë të iniciuara dhe miratuara nga krerët politikë në vend, që sipas ish-ministrit të Drejtësisë, nuk kanë asnjë kompetencë apo specializim për të marrë të tilla vendime. Kjo detyrë mjaft e rëndësishme në një situatë sensitive si kjo e vaksinimit, ku shumë qytetarë hezitojnë të marrin dozat e vaksinave ka nevojë të trajtohet nga profesionistë, ndaj Manjani thekson se është mjeku që ka ndjekur nga afër pacientin që duhet të vendos lidhur me vaksinimin e një pacienti, teksa nënvizon se kjo çështje duhet të trajtohet gjerësisht në debate publike.
“Në gjykimin tim, vaksinohet apo jo individi duhet ta vendosë vetë bazuar në rekomandimin e mjekut. Ky i fundit mban përgjegjësi për rekomandimin që jep.
Vaksinimin nuk e vendos dot kryeministri! As Qeveria!! As Parlamenti!!!
Vaksina është ndërhyrje parandaluese që bazohet në protokolle strikt mjeksore dhe aplikohet rast pas rasti mbi persona vetëm pasi e sugjeron mjeku. Ky e di gjendjen fis-patologjike të personit për të cilin kujdeset dhe duhet të jetë në gjendje të përcaktojë lejimin ose jo të vaksinimit dhe pasojat eventuale.
Askush tjetër nuk mund të marrë vendim për trajtim shëndetësor të individit! As OBSH-ja e as OKB-ja! Gjykoj se kjo qasje duhet të jetë në themel të debatit publik, vaksinë me detyrim ose jo.
Unë personalisht i bindem mjekut në këto çështje dhe askujt tjetër!”
Manjani thekson se ky rregull referuar statistikave, të cilat i cilëson si orientuese dhe jo ligjvënëse, penalizon trajtimin e rasteve specifike të personave që nuk munden të vaksinohen nga problemet fisiologjike. Sipas tij, vendosja e këtyre rregullave gjithëpërfshirëse nuk respekton as individin dhe as mjekun në kryerjen e detyrës së tij.
“Është gjithashtu e provuar statistikisht se virusi vijon të infektojë agresivisht të pavaksinuarit. Por kjo mbetet statistikë thjesht orientuese jo ligj i detyrueshëm për çdo individ! Sepse rasti rastit nuk i ngjan. Ka edhe të vaksinuar që infektohen e madje edhe vdesin. Ndonëse statistikisht pak, por janë. Ndaj mjeku duhet ta vendosë rast pas rasti, jo hyrrabyrra opçe se na erdhi furnizimi!! Nga ana tjetër të nxjerrësh rregulla ligjore që i fusin të gjithë në një thes, pa respektuar individin dhe rekomandimin e mjekut është dhunë krejt joproporcionale! Çdo me thënë nuk merr shërbim publik nëse nuk je i vaksinuar?! Po nëse kushtet fisiologjike nuk ta lejojnë vaksinimin nuk meriton shërbime?! Çdo me thënë kjo?!”, shkruan Manjani.
Discussion about this post