Që nga aksidenti i ndodhur në Astir, kur një ashensor u shkëput dhe mbetën të dëmtuar dy gra, numër i lartë ankesash janë depozituar nga banorë të pallateve të tjerë pranë ISHMT.
Përmes një njoftimi zyrtar, ISHMT bën të ditur se ka ngritur grupet e punës për të monitoruar situatat në objektet e referuara nga ankesat e ardhura.
“Pas verifikimeve është ndaluar përdorimi për ashensorët që organet i kanë nxjerrë me risk të lartë dhe për ashensorët ku administratori nuk ka rënë dakord me banorët e pallatit për ekzaminimin e ashensorit”, bën të ditur ISHMT.
Ndërsa, për ashensorët, për të cilët administratori bashkë me banorët kanë kryer raportet e ekzaminimit të plotë nga organet e miratuara, ISHMT është në proces për të bërë regjistrimin e tyre në regjistrin kombëtar të ashensorëve.
Ligji “Për administrimin e bashkëpronësisë në ndërtesat e banimit” parashikon se është detyrë e administratorit të ndërtesës në bashkëpronësi që në bashkëpunim me banorët të kryejnë kolaudimin e ashensorit pranë organeve dhe më pas regjistrimin pranë ISHMT-së. Nga kontrollet e kryera, konstatohet që në pjesën më të madhe të rasteve, personi me përgjegjësi ka qenë administratori i banesës”, bën të ditur ISHMT.
Kanë qenë të shumta rastet ne vend ku qytetarët janë dëmtuar nga defektet e ashensorëve, pasi këto të fundit nuk kontrollohen rregullisht.
