Ende asnjë shenjë nga autori apo autorët e atentatit me armë zjarri që terrorizoi banorët mbrëmjen e djeshme në Don Bosko. Policia ka ndërmarrë një aksion për arrestimin e personave të shpallur në kërkim, por masakra në Don Bosko, mbetet e pa zbardhur.
Nga atentati, mbeti i vdekur 35-vjeçari Erion Çela dhe u plagosën rëndë 4 të tjerë, mes tyre edhe vëllai i viktimës.
Edhe pse në një zonë të populluar të kryeqytetit dhe të rrethuar me kamera sigurie, policia nuk ka zbardhur ende dinamikën e ngjarjes dhe gjurmët e para të autorëve.
Ndërkohë që sot ka arrestuar 7 persona të cilët nuk kanë lidhje me atentatin.
Burime zyrtare nga policia bëjnë me dije se është arrestuar në flagrancë personi i identifikuar me iniciale M. K., banues në Kavajë, pasi gjatë kontrollit nga shërbimet e Policisë iu gjet dhe sekuestrua në cilësinë e provës materiale një armë zjarri pushkë automatike me fishekë luftarakë.
Në njoftimin për shtyp nga policia, gjithashtu bëhet me dije se gjatë paradites së sotme është arrestuar edhe personi i identifikuar me iniciale E. Z., 42 vjeç i cili ishte në kërkim për veprat penale “Vjedhja” dhe “Shtyrja e të miturit në krim”. Po ashtu i arrestuari në fjalë, ka shtyrë një të mitur 14 vjeç, për të vjedhur një lokal.
Specialistët për Hetimin e Krimeve në Komisariatin e Policisë Nr. 1 arrestuan të riun me iniciale H. D., 20 vjeç, i i cili ishte në kërkim për veprat penale “Shkatërrimi i pronës me zjarr”, mbetur në tentativë, kryer në bashkëpunim dhe “Organizimi dhe pjesëmarrja në grumbullime e manifestime të paligjshme”.
Nga aksioni i sotëm, policia ka vënë në pranga edhe personin e identifikuar me iniciale Sh. Z., 42 vjeç, pasi ka ushtruar dhunë fizike dhe psikologjike ndaj bashkëshortes së tij.
Në fund të njoftimit për shtyp nga policia, theksohet se specialistët e Qarkullimit Rrugor bënë arrestimin në flagrancë të personave:
– E. M., 28 vjeç, D. T., 54 vjeç dhe Q. T., 37 vjeç, pasi u kapën duke drejtuar mjetet përkatëse, në gjendje të dehur;
– R. L., 30 vjeç, pasi duke drejtuar mjetin e tij, është përplasur me mjetin me drejtues U. V., dhe si pasojë e përplasjes janë dëmtuar dy drejtuesit e mjeteve dhe pasagjerët e mjetit që drejtohej nga U. V.
Discussion about this post