Numri i lartë i lojtarëve të infektuar nga Covid-19 është kthyer në problem për futbollin italian. Por ajo që ka ndodhur sot në mbrëmje e ka bërë shumë qesharake këtë situate pasi Napoli mori “ok” nga ASL, autoriteti lokal shëndetësor që të udhëtonte drejt Torinos për ndeshjen me Juventusin.
Por me të zbarkuar me avion në qytet, po ASL ka vendosur të bllokojë 3 lojtarë të Napolit ku mes tyre është edhe kapiteni dardan, Amir Rrahmani. Siç mësohet, arsyeja e izolimit të Rrahmanit, Zielinksit dhe Lobotkas është fakti që nuk kanë dozën e tretë dhe kanë patur kontakte me të tjerë të infektuar me covid-19. Ndeshja me Juven për momentin nuk është shtyrë por ndryshe ka ndodhur me disa të tjera.
Interi që kishte udhëtuar në Bologna, ka marrë vesh në këto momente që ASL ka bllokuar zhvillimin e ndeshjes pasi ekipi vendas ka 8 raste me covid-19. Gjithashtu Salernitana nuk do të paraqitet në sfidën me Venezian për të njëjtën arsye dhe Torino nuk është nisur për në Bergamo.
Discussion about this post