Vanagjel Tavo është paraqitur në ambientet e Prokurorisë së Posaçme këtë të martë. Në dalje, Tavo tha për gazetarët se u mor në pyetje si person në dijeni për një kallëzim të bërë në vitin 2021.
Asokohe, Tavo ka një kallëzim ndaj një personi në prokurorinë e Gjirokastrës, për të cilin ka deklaruar se i ka përdorur emrin dhe ka shkuar në disa shtëpi banorësh për të ofruar para në këmbim të votës.
“Një individ i kurdisur nga ‘Rilindja’ ka shkuar në disa lagje dhe shtëpia banorësh duke përdorur emrin tim, duke u shtirur e gënjyer sikur është i dërguari im, duke pyetur banorët se kush janë familjet në nevojë që t’u japë para dhe t’u blejë votën. Kaq poshtë ka rënë “Rilindja” dhe kaq të ligë dhe të paligjshëm janë sa që kryejnë veprime të tilla kaq të ulëta dhe kaq korruptive duke u përpjekur të minimizojnë humbjen e madhe që i pret më 25 prill. Ky skandal vjen menjëherë pas denoncimit tim publik që bëra në media para pak ditësh se në Gjirokastër po blihen vota nga ‘Rilindja'”, do të shprehej Tavo në 2021, asokohe kandidat për deputet që udhëhiqte listën e LSI-së në qarkun e Gjirokastrës.
Kujtojmë se Vangjel Tavo ishte ndër emrat që u kallëzuan në SPAK nga ish-deputeti Halit Valteri bashkë me kreun e PL-së Ilir Meta dhe bashkëshorten e tij Monika Kryemadhi, në atë që njihet si dosja e lobimit në Shtetet e Bashkuara të Amerikës.
Në 13 Mars, Tavo u emërua prefekt i Qarkut të Vlorës me një vendim të qeverisë, që mban firmën e kryeministrit Edi Rama.
Më vonë gjatë muajit, ishte protagonist i një incidenti në mbledhjen e Këshillit Bashkiak në Himarë kur u votua kryetarja e re Blerina Balla. Prezenca e Tavo u kundërshtua nga mbështetësit e Fredi Belerit, ndërsa njëri prej tyre e pështyu.
Ndërkohë, në mediat greke është përfolur se Vangjel Tavo është i zgjedhuri i Ramës për të marrë drejtimin e bashkisë së Himarës.
Vangjel Tavo ka qenë më herët në radhët e LSI-së, teksa ka mbajtur poste të rëndësishme si deputet dhe ministër i Shëndetësisë.
Discussion about this post