“Vangjush Dako kthehet në burg pas përmirësimit të shëndetit, dënimi mbaron më 27 shtator”

Ish-kryebashkiaku i Durrësit, Vangjush Dako, është rikthyer sot në burgun e Durrësit, pas përmirësimit të gjendjes së tij shëndetësore. Dako ishte shtruar në repartin e Sëmundjeve Infektive për shkak të problemeve shëndetësore, përfshirë aritminë, ankthin dhe herninë diskale.

Sipas avokatit të tij, ai do të qëndrojë në burg vetëm për 6 ditë, pasi dënimi i tij prej 2 vjetësh e tetë muajsh për shpërdorim detyre përfundon më 27 shtator. Pjesën më të madhe të dënimit, Dako e ka kryer në arrest shtëpie.

Ai u dënua nga Gjykata e Apelit të Posaçëm për dy raste shpërdorimi detyre: miratimin e lejes së ndërtimit në favor të shoqërisë Fakle sh.p.k, ku dokumentet u përpiluan dy vjet pas përfundimit të ndërtimit, dhe për një procedurë prokurimi për shërbim konsulence lidhur me projektin “Projektim zbatim për Promenadën Bregdetare dhe Plazhin publik nga Bërryli deri në Currila”.