Dinamo luan nesër kundër Egnatias në Elbasan një ndeshje shumë të rëndësishme, që duhet ta fitojë me çdo kusht. Trajneri Rodolfo Vanoli ka deklaruar para mediave: “Jemi të vetëdijshëm që kjo do të jetë një ndeshje e rëndësishme për kampionatin, por nuk do të jetë ndeshja vendimtare sepse ka ende shumë pikë dhe sfida në dispozicion.
Pushimi na shërbeu për t’u njohur më shumë edhe për të kuptuar se çfarë duhet të përmirësojmë. Duke parë dhe ndeshjen ndaj Tiranës, ku djemtë kanë bërë një paraqitje pozitive, jam i bindur që nëse mbajmë këtë ritëm dhe mentalitet mund të bëjmë gjëra të mëdha”.
“Egnatia? Jemi të vetëdijshëm që luajmë me një skuadër të fortë, sepse ka 4 pikë më shumë se ne, por do të jetë fusha ajo që do të thotë se cila është më e fortë. Ashtu sikurse edhe ndaj Tiranës, ne do të shkojmë ta luajmë këtë ndeshje. Kam djem të mrekullueshëm që po stërviten shumë mirë”.
“Duhet të shpëtojmë me çdo kusht. Kemi ende 10 ndeshje përpara dhe 30 pikë në dispozicion. Duhet të luajmë 10 finale, sepse nëse fitojmë nesër dhe humbasim duelin e ardhshëm jemi sërish në vendnumëro. Na duhet vazhdimësi. 8 ndeshjet e fundit të kampionatit, Dinamo ka marrë 4 pikë, ne duhet të ndryshojmë gjithçka. Ne kemi sulmues të fortë dhe të rinj”.
“Fusha? Nuk më intereson faktori i jashtëm, më intereson vetëm fusha e blertë. E njoh kampionatin shqiptar, i njoh dhe disa nga kampionatet në Europë, por besoj gjithmonë në gjëra pozitive, në një sport të vërtetë dhe uroj që nesër të jetë një ndeshje sporti. Nuk duhet që të flasim për gjëra të tjera.
“Portieri Simoni? Falë Zotit nuk e kishte dëmtimin të rëndë, për 10 ditë besoj se do të jetë në dispozicion, por nuk kemi vetëm atë, kemi dhe dy portierë të tjerë. Jam besimplotë për atë që do të luajë nesër”.
Discussion about this post