Ndërsa kurba e të infektuarve është zbutur, në javët e fundit duket sikur pandemia po largohet nga vendi ynë. Por jo, pasi varianti i ri i Omicron përbën ende rrezik. Këtë gjë ka thënë edhe Aurora Dollenberg, specialiste e Urgjencës, gjatë një interviste televizive. Dollenberg foli për gjendjen aktuale të pandemisë “Covid-19”, duke theksuar se në Shqipëri ekzistonte një rrezik sa i përket variantit të ri “ba2” të shfaqur së fundmi. Mjekja tha se, ndryshe nga vendet e tjera europiane në Shqipëri kishte pasur shifra të ulëta vaksinimi dhe kjo mund të bënte që ky variant të mos kalohej në mënyrë “asimptomatike” nga ana e qytetarëve.
Ndërkohë e pyetur nëse duhet të panikosemi nga varianti i ri, Dollenberg tha se duhet të tregohemi të kujdesshëm pasi rreziku në Shqipëri është ende i lartë. “Për pjesën më të madhe të Europës nuk ka arsye. Ndërsa sesa arsye ka për Shqipërinë kjo varet nga statusi i të vaksinuarve në popullatë. Për fat të keq, Shqipëria ende nuk e ka kaluar masën e 60% të vaksinimit prandaj ka frikë se ata persona të cilët nuk janë vaksinuar, mund ta përjetojnë variantin e ri të covid me pasoja dhe me simptoma, duke qenë edhe një rrezik me shëndetin. Pra për Shqipërinë ekziston një rrezik i tillë”, tha ajo.
Sipas mjekes ne jemi më të rrezikuar pasi edhe kur kemi pasur rregulla dhe masa kufizuese nuk i kemi zbatuar ato. Shto këtu faktin se është vaksinuar vetëm një pjesë e vogël e popullësisë.
Discussion about this post